روحى فداك يا نبى

دفاعا عن النبى صلى الله عليه وسلم ولو بكلمة أضع قصيدتى المتواضعة وانا أعلم جيدا أن كل الحروف تتضاءل أمام فضل سيد البشر على الأمة كلها...
______________________________
ماهوش إحتلال
ماهوش إفتراء
ماهوش إشتعال النيران
ماهوش موات أو حتى موت
دى وصلت للنبى
ولما توصل للنبى
يبقى السكوت قبر
والضحك موت
والصبر مش مفتاح فرج
الصبر سكة ميتيين
والغل نبت شيطانى
طالع من رؤوس شياطين
من إمتى كان الحب يجرى
ف قلب أسود
من إمتى كان الليل بيعشق صبح
من إمتى كانوا المشركين
رافعين سيوف الحق
..............................
كانوا الصحابة
لما حاوطوا المشركين سيدنا النبى
نسيوا أحد
لكنهم هبوا قوام
أرواح فداء المصطفى
أبدان بتوهب دمها
لو ألف حتة اتقطعت
روحى فداك يا نبى
كان الفتى مصعب
رافع الراية بإيد
وإيد ترجع سيوف الغدر
عن صدر النبى
ضحى بإيديه
شوف الغرام وصل لإيه
حتى وهما مقطوعين
آخر كلامه
روحى فداك يا نبى
...........................................
الرسمه دى قصدها إيه
حافظين الشهادة ولا نسيناها
سورة محمد أولها إيه
طه النبى جوا قلب المسلمين
ولا إيييييه
الرسمة دى بتسألنا مين إحنا
لو كنا أحباب النبى
حنبقى حقيقى إحنا
لو كنا نسينا النبى
حنبقى فين إحنا
إحنا اللى لم نبقى
إلا برسالة نبينا
الرسمة دى بتسألنا عن سورة الأحزاب
لو سكتنا زى ما سكتنا كتير
يبقى اتغلبنا ف بدر
ولسه ما وصلنا تبوك
الرسمه دى بتسألنا ع الأنصار
وعن طلعة البدر وعليهم
لو سكتنا زى ما سكتنا كتير
يبقى ماوصلش نبينا للمدينة
الرسمة دى بتسألنا عن شهداءنا
لو سكتنا زى ما سكتنا كتير
يبقى شهداءنا مصلوبين
ماتوا قبل ما يقولوا الشهادة !!
..........................................
أبو بكر دارى شقوق الحيط بكف إيديه
علشان حبيبه المصطفى
فى الغار ينام قرير العين
إتحمل اللدغة من التعبان
وبدون ما يدرى
نزلت دمعته سخنه على خد الرسول
روحى فداك يا نبى
أبو بكر دارى شقوق الحيط بكف إيديه
والتعبان ياللعجب
كان قصده يتملى من نور النبى
...........................................
تعابين بتتلوى على الجرانين
سمها ف دواية حبر
إيد مجوس بتتطاول على سيدنا النبى
تار قديم بينها وبينه
من يوم ما كسر الأصنام
من يوم ما حط النور ف ليلهم
من يوم راية الإسلام ما عليت
تار وبايت
من يوم لسان العجم
ما اتعلم يصلى ع النبى
تعابين بتتلوى على الجرانين
تعبان يا قلبى لو قلت آه وسكت
وآه عليك
لو قلت اتعلم الحكمة
مع اللى شتموا ف نبينا
....................................
يا حرف عطشان بكا وعويل
الوقت مش وقتك
واليوم ده مش يومك
لو كنت بتحب النبى
خليك قوى
واطلع على سن سيف خالد
المس ف قلب الفاروق
واجرى ف عروق جعفر
لو صحيح يا حرف بتحب النبى
خلى الحروف تنده معاك
روحى فداك يا نبى