اجتماع عميدة جامعة سعود ووكيلة اللغات والترجمه مع طالبات الترجمه(خذ وانطل)

السلام عليكم ورحمه الله وبركاته

هذا الموضوع نقلته حرفيا كما كتبته صاحبته عن (اللقاء اللي صار بين عميدة الجامعة وكليه القسم مع بنات الترجمه)

هذا الموضوع امتدادا لحملتي على جامعة القرف لفضحها خخخخخخ وحتى تقتنع الاخت هيــــا

اخليكم مع الموضوع وانتوا احكموا على الوعود الواهيه (^_^)


يوم الثلاثاء

15/5/2007
27/4/1428

كان اجتماع وكيلة الترجمة ((هدى الحليسي )) وعميدة جامعة الملك سعود ((حصة المبارك))

مع الطالبات لحل مشاكلهــــــــم..

بدأ الاجتماع بوتيرة الوعود المزيفة كالعادة..

في البداية حضرت مجبرة للاجتماع ..ولما وصلت للباب قالوا مافي أماكن ..

بطريقة او بإخرى حضرت عشان الدكتورة قالت بتحضرنا هناك <نصبة منها طبعا ..

طبعا الكراسي مليااااااااااااانة اضطرينا نوقف الباقيين ..

مافي أي إشكال اهم شي نسمع احد يحل لنا مشاكلنا ..

ابرز الأسئلة ..(( الكلام كله بالمعنى وليس اللفظ ))


1-الـ5 سنوات هل في الامكان تقليلها حتى تصير 4 سنوات مثل باقي الجامعة ؟

هدى الحليسي :- لو بيدي اخليها لكم 6 سنوات ..

2-بالنسبة للمعامل اللي عندنا ما تشتغل اغلبها ويبيلها تصليح كل مرة !؟
مافي مجال نسوي لها صيانة ؟! او نزيد عددهم لأن جداا قليلة وحنا عندنا ترجمة فورية وثنائية و..الخ ؟؟

هدى الحليسي :- انا طالبت الجامعة بأن المبنى يكون ثلاث ارباعه معامل لأن احتياجنا للمعامل كبير و منها يكون للفايدة ..

((متى ؟؟ وكيف؟؟ وهل ؟؟ الله اعلم ))

((على العموم اعرف الرد وش رح يكون بيقولون رح نسويها في الجامعة الجديدة اللي قاعد تنبني اللحين ))

3-طلعت بنت تقول انها كتبت مقالة في الجريدة ..مبنى 22 ...استاذه حصة تخيلي تدرسين في حمام الله يكرمك تقدرين ؟؟
الريحة الكريهة هذي تجيب الامراض وانا جاني القولون العصبي منها !! وكتبت مقالة في الجريدة عن هالكلام !! نبغى حل منكم..!؟

طبعا المايك وخروه ع الجنب وبدأت سلسلة من الحوارات الخفية ..

هدى الحليسي :- مافي اي مانع نصلحها بس رح تجلسون معنا للساعة 4 العصر ..! عندكم مانع؟

((اعترف بذكاء هدى الحليسي هنا ))

طبعا البنات قالوا لااااااااااا واصوات خفيفة كانت تقول ايه ..

((طبعا للساعة 4 عشان عدم توفر القاعات ..والمبنى 22 ساعد في اخذ كلاسات هناك خصوصا للمستوى الثالث ومستوى ثاني ما اعرف ايش هوا بالضبط ))

قالت البنت معقولة جامعة كاملة ما عندها ميزانية تصلح مبنى مثل 22 وهو محتاج صيانة كاملة له.!؟

حصة المبارك :- يا بنتي المبنى ما يكفيه الصيفية عشان يتصلح ما يكفيه شهرين يبيله 12 شهر <<محد اصلن جاب طاري الصيفية !
المبنى تحته رياض اطفال ويبيلنا تنسيق معهم المبنى مو لكم لوحدكم ..<<ع فكرة المبنى من دورين والسطح

البنت تبي ترد ..

(( 12 شهر اجل !!بيوت تتبنى في 12 شهر وتصليح حمامات الله يكرمكم يبيلها 12 شهر ونعم الرد ))

حصة المبارك :- عطوا المايك لغيرها نسمع مشاكل البنات الثانين نعطيهم فرصة ..

4-بالنسبة للنص كم !! ممكن تسمحون لنا نلبس نص كم !؟! حنا مو مثل كلية اليمامة نبي نلبس بنطلون كل اللي نبيه نص كم متنا من الحر في الصيف !! واذا تشوفين كل الجامعة
تلبس نص كم اللهم نلبس بلوزة فوق ونفكها اذا جينا نطلع من البوابة بعد التفتيش ..!
لا نبي نلبس علاقي ولا شي كل اللي نبيه نص كم والألوان !؟

حصة المبارك :- انا شايفتكم كلكم هنا لابسين نص كم وألوان بعد !!وبعدين يا بنتي انتي طالبة جاية مكان دوام رسمي ..مكان علم .. تدرين ايش رح يكونفي تشديد اكثر الترم الجاي رح ندخل القاعات نشوف ملابسكم !! انا كنت اتناقش مع الاستاذه هدى الحليسي نقول انتم الطالبات تاخذون الكثير وتعطون القليل ...بمعنى لو سمحنا لكم ب نص كم رح تلبسون اقل منه..

هدى الحليسي :- ليش سألتي السؤال!! <<يعني كان سكتي احسن

5-بالنسبة للطلعة خارج البوابة !! ليش البوابة ما تكون مفتوحة انا شفت نظام في كلية اليمامة حلو البطاقة الخضراء للبنت اللي سامحين لها اهلها تطلع اي وقت والبطاقة الحمراء اللي اهلها سامحين لها تطلع حسب الجدول ..!!

حصة المبارك :- يا بنتي البوابة كانت مفتوحة زمان لكن البنات تمادوا والأهالي طلبوا مننا اغلاق البوابات حرصا على بناتهم ..!!

البنت :- طيب والاهالي اللي يبون بناتهم يطلعون !!؟

حصة المبارك:- الجامعة لن تفتح ابوابها الا الساعة 12..

البنت :- يعني استاذه بتقنعيني ان بنات العلوم الصحية اللي مسموح لهم يطلعون اهلهم ربوهم اكثر من بنات الجامعة الباقيين!! احنا بنات كبار !! بعضنا والكثير منا متزوج وعنده اطفال !! وحنا نجلس بالساعات فاضين يكون عندنا محاضرة من الساعة 8-9 والباقي فاضين ننتظر للساعة 12 حتى تفتح البوابة !!!!!!!!! طيب اذا جبنا لكم اخلاء طرفكم من اهالينا ويكونون اهالينا هم المسؤولين عنها !!؟ حنا كبار يا استاذه عيب اقول الجامعة تخاف اغلط ومافي ثقة في طلعتي !! وبعدين استاذه البنت اللي براسها غلط بتسويه في الجامعة او برى الجامعة ما فرقت الجامعه معهم !!!

حصة المبارك :- ما نقدر ...البوابة حاليا ما رح تفتح الا الساعة 12 وبنشوف نتدارس القرار ..

6-بالنسبة للانترنت !؟ متى يدخل الجامعة !!

حصة او هدى ما اذكر :- لو تقرون جريدة الجامعة رح تعرفون ان النت موجود من كم شهر في المكتبة !! <<في المقبرة قصدها اكيد

((المكتبة هذي !! على قولة وحدة من دكاترتنا تقول الجامعات تفتخر بكبر مكتباتها !! وحنا استغفر الله بس وقسم تضيق نفسي لو دخلت هناك كلها مرة وحدة اذكر رحت هناك وريحة الغبار تعج عج منها !! واول ما دخلنا قالوا لنا شنطكم برى!! لا يا شيخة وشو شنطكم برى يعني بسرق هالكتب القيمة ولا بسرقها !! كيف طيب رح اكتب من المراجع والاشياء هذي !! شنطتي فيها اشيائي الشخصية كيف اتركها برى للي رايح واللي جاي !!!!!! تكفون يا مكتبة جامعة هارفرد وبالنسبة للنت وحدة من صديقاتي تقول مررررررررررة بطيء .. ))


7-نحتاج studying room لنا حتى نقدر نذاكر بعيد عن صجة البنات والاكل المرمي في كل مكان والحر والشمس !!؟

هدى الحليسي (بسخرية) :- رح نحط لكم روم في مبنى 22 بعد ما نصلحه ..

8-هل صحيح ما سمعناه عن تقسيم قسم الترجمة وانه بتتغير الخطة الدراسية وهل بيكون في قسم للغة؟!

هدى الحليسي :- نعم صحيح ورح يصير في قسم للغة ورح ندخل اللغة الفرنسية للقسم الفرنسي ..والخطة كاملة رح نشوف مدى تطبيقها في سبتمبر الجاي..

((كيف,شلون,وليش ...الله اعلم ))

9-بالنسبة لقسم الفرنسي ..محتاجين كتب !!!!!!!!!!!!!!!! الكتب الفرنسية ما نلقاها في المكاتب حتى مكتبة جرير !! لازم نطلبها طلب من خارج المملكة ..!! ورحنا كلمنا السفارة الفرنسية قالت ما نعرف انه عندكم قسم فرنسي في المملكة اصلن

هدى الحليسي (تسأل دكتورتين) :- انا ما رحت معكم السفارة الفرنسية وزي اللي تجاهلونا !! كيف ما يعرفون انه في قسم لا يعرفون طبعا !!

تدخل من حصة المبارك :- استاذه (مدري مين ) انتي مسؤولة عن المكتبة جاوبيهم ..

المسؤولة عن المكتبة :- احنا عندنا ميزانية ممكن نجيب لكم كتب فرنسية رح نجيب لكم 5 كتب

((كثر الله خيرك ))

(( الوضع سيء مع قسم الفرنسي محد لمهم ابد احس وجودهم حتى بالغلط ))

بدو يهرجون بالفرنسي وانا مفهية

10- وبالنسبة للترم الصيفي مافي مجال تساعدونا وتحطون لنا ترم صيفي؟

هدى الحليسي :- انتم سجلوا اسمائكم في القائمة وهي رح ترفع للعميد بعدين تجي الموافقة منه وبعدها نشوف في دكاترة يبون يدرسون صيفي او لأ اذا ما يبون ما نقدر نفتح صيفي ..لو يبون نسوي تأكيد لأسماء المسجلين ..!والدكاترة جايين من مصر وسوريا ولبنان عشان يدرسونكم <قوية
ويبغون يرجعون لبلدهم في الصيف مع اولادهم واهلهم ..

((طيب والخريجات اللي جالسين في البيت السعوديات اللي جايبين امتياز وياكثررررررررررهم عطوهم فرصة يدرسونا في الصيفي والله يقبلون بأي مبلغ فوق 1500 مقابل الخبرة في الجامعة وايش هي المواد اصلن !! مواد اعداد عام !!!!!!! ما طلبنا شي بس حسبي الله ونعم الوكيل ما يعرفون يصرفون الميزانية في شي مفيد!! ))


11-انا ابي اتكلم عن بروفيسورة اعتقد اللكل يعرفها (ريما الجرف) هل صحيح انه مافي اي اسئلة امتحان ما تمر الا من تحت توقيعها ؟؟ وليش دامه مستواها عالي جدا تمسك المستويات المبتدئة ؟؟ ليش ما تمسك المستويات العالية ؟؟وبالنسبة للاسئلة حقت الامتحان صعبة ولا تجي في مستوى الكتاب يا تصعبون لنا المنهج بحيث يكون مثل الاسئلة ونتدرب عليه او تسهلون الاسئلة ويكون مثل درجة صعوبة الكتاب!!؟

حصل تجاهل للسؤال عن ريما الجرف ...جاوبت هدى الحليسي :- السؤال اللي بعده..

بعد فترة ردت ع السؤال بعد تذكير احد الطالبات ..وقالت هدى :- نشوف وش بنسوي..!
صار في اسئلة مختلفة كان الجواب عليها واحد :- نشوف يا بنتي + ندرس القرار ..

طبعا هنا عرفت ان الاجتماع اسمه (( تســـكيتــه )) ...اللهم الحاجة الوحيدة اللي طلعنا فيه تغير الخطة الدراسية للجيد او للسيء الله اعلم..

الطالبة في الترجمة بلا فخر : Mafia Girl

نقلت حتى اسم كاتبة الموضوع حفظا لحقوقها (^_^)

خيتوو هيـــا إن شاء الله الحين اقتنعتي (^_^)

وانتم وش رايكم في اللي قريتوه؟؟يعني تلوموني اذا انهبلت وصرقعت؟؟

بانتظااار تعقيبكم

تحيـــــــــ Mod Mod ـــــــــــتي