قصتي مع جاري ابو فايز

العمر لحظات

انا بقولكم قصتي مع جاري ابو فايز.
هذا ابو فايز رجال ونعم بس زي ما يقولون دقة قديمة كل يوم خميس عندة شبة الصبح وانا دايم قبل لا اروح للدوام اخذ فنجان عندة وبعدها ادربي راسي على الدوام وكل خميس على هالمنوال ابو فايز هذا اذا دخل المجلس ما يجلس الا بصدر المجلس يعني الرجال يستاهل راعي علوم و وجة ارجال .....
ابو فايز متزوج ثلاث حريم ويقول انة عادل بينهم كل يوم ينام عند وحدة يعني هذا مفهومة للعدل اخر ايامة طاح بالمسيار وخلى الرابع فرار .
يوم من الايام عزمتة على فنجان ووافق وعطيت خبر للربع كلهم وقلت ابو فايز عندي ما صدقوا خبر المهم المجلس صك على الاخر قلت للشغالة ضبطيلنا قهوة مية مية ولا تفشلينا الرجال شريب قهوة قمنا نسولف عن حقوق المرأة .... وقيادة المرأة للسيارة .....والاصلاح......والعمالة الي مغرقة البلد ..... وهالشباب الي مخلين هالمجالس والشبات ومقابلين الانتر نت ... انا ما اخفي عليكم مابي ابو فايز يدري اني اطقطق على النت.
خاصة انة عندة اراء متشددة من هذة المواضيع الي ذكرناها ..
وفي يوم من الايام عزمني واحد من ربعنا سعودي بالدوام قال ودي تخاويني للبحرين قلتلة تم
بس بكرة خميس ومعزوم على الشبة عند ابو فايز قال ما عليك اعتذر لة قلت تم مرة ثانية المهم تواعدنا ودقينا السيارة سلف وعلى البحرين وانا على الطريق دقيت بالجوال على واحد من الربع وقلتلة تعذرلي من ابو فايز انا مسافر لحفر الباطن قال ابو فايز اليوم ماشفناة شب ممكن الرجال مسافر او مريض قلت بنفسي احسن .... المهم وصلنا للبحرين قال صاحبي وش رايك نسهر اليوم بمرقص روسي على كيفك قلت تم المهم اول ما دخلنا المرقص الا الانارة خافتة وصوت الموسيقى عالي وفية غروب بنات جالسات ترقص على البست اخذنا انا وصاحبي زاوية مظلمة وجلسنا واصلين حدنا بالوناسة وشفنا هالعالم الي ترقص والناس مختبصين .... صاحبي الي معاية بالدوام يقول باللة شوف هالشايب هالعايب الي يترقص مع هالروسية قلت وينة قال شوف وراك طالعت .... صدق كذب ...... هذا خوينا ابو فايز ......
بيني وبينكم تكدر طلعت من الديسكو على الجسر على طول وانا جالس بجنب السواق اتذكر ابو فايز ... وصدر المجلس... والقهوة.. وعلوم الرجال... والشبة كل يوم خميس .... ومعارضتة الشديدة لقيادة المرأة ......
هذة القصة حقيقية حدثت لي وانا متاكد بان ابو فايز يمثل الغالبية ولكن ما نحتاج الصدق مع انفسنا واضهار مانخفي.
.